አዲስ አበባ ( ኢትዮጵያ ቱደይ) ነሀሴ 15 ቀን 2016 ዓ.ም።
ሚኒስቴሩ ሰኞ ነሐሴ 13 ቀን 2016 ዓ.ም. በተጻፈ ደብዳቤ፣ የዲፕሎማሲና የቆንስላ አገልግሎት የሚሰጡ ቀጣናዊና ዓለም አቀፋዊ ተቋማት፣ ወደ አገር ውስጥ የሚያስገቧቸው ተሽከርካራች የኤሌክትሪክ ብቻ መሆን እንዳለባቸው አስታውቋል፡፡
ኢትዮጵያ የአየር ንብረት ለውጥን ለመታገል በምታደርገው ቁርጠኝነት፣ በነዳጅ የሚሠሩ ተሽከርካሪዎችን ማስገባት የተከለከለ መሆኑን የውጭ ጉዳይ ሚኒስቴር አስታውቋል፡፡ በመሆኑም የዲፕሎማቲክ ማኅበረሰብ አባላት በኤሌክትሪክ የሚሠሩ ተሽከርካሪዎችን ብቻ እንዲያስገቡ፣ በዚህም መሠረት ከቀረጥ ነፃ የማስገባት መብታቸውን እንዲጠቀሙ ሲል ገልጿል፡፡
የገንዘብ ሚኒስቴር ሰኞ ነሐሴ 13 ቀን 2016 ዓ.ም. በሚኒስትር ደኤታው ኢዮብ ተካልኝ (ዶ/ር) ተፈርሞ ለጉምሩክ ኮሚሽን የላከው ደብዳቤ፣ የገቢ ንግድን በይበልጥ እንዲያሳልጥ ወደ አገር ውስጥ እንዳይገቡ በሕግ ከተከለከሉ ዕቃዎች፣ የነዳጅ አውቶሞቢሎችና ከፀጥታና ከደኅንነት ዕቃዎች ውጪ ሌሎች ዕቃዎች ያለ ውጭ ምንዛሪ ክፍያ (ፍራንኮ ቫሉታ) ወደ አገር ውስጥ እንዲገቡ በመንግሥት የተወሰነ መሆኑን በመግለጽ ተግባራዊ እንዲደረግ አሳስቧል፡፡
የውጭ ጉዳይ ሚኒስትር ቃል አቀባይ በጉዳዩ ላይ ለሪፖርተር በሰጡት አስተያየት፣ ይህንን ውሳኔ በርካታ የአውሮፓ አገሮች የሚደግፉት ሐሳብ መሆኑንና አገሮች የአስተናጋጅ አገርን ሕግ አክብረው እንዲንቀሳቀሱ ይጠበቃል ብለዋል፡፡ ውሳኔው የዲፕሎማሲ ሥራን ለመሥራት የሚያውክና የአገሮችን ሉዓላዊነትን የሚጥስ ባለመሆኑ፣ እንደ እነዚህ ዓይነት ሕጎች ሲወጡ ዲፕሎማቶች ያንን ሕግ አክብረው መንቀሳቀስ ይጠበቅባቸዋል፡፡
ከዚህ ቀደም የኢትዮጵያ ብሔራዊ ባንክ በነዳጅ የሚሠሩ ተሽከርካሪዎችን ጨምሮ 38 የገቢ ንግድ ምርቶች ዕግድ እንዲነሳላቸው ባሳለፈው ውሳኔ ቢያሳውቅም፣ የገንዘብ ሚኒስቴር ግን በነዳጅ የሚሠሩ ተሽከርካሪዎች ላይ ዕግዱ እንደማይነሳ ማስታወቁ ይታወሳል፡፡
የገንዘብ ሚኒስቴር ለብሔራዊ ባንክ፣ ለገቢዎች ሚኒስቴርና ለጉምሩክ ኮሚሽን አስተላፎት በነበረው ሰርኩላር፣ በተወሰኑ ምርቶች ላይ የውጭ ምንዛሪ ገደብ ተጥሎ እንደነበር አስታውሶ፣ ዕገዳው ከሐምሌ 21 ቀን 2016 ዓ.ም. ጀምሮ መሻሩን ገልጾ ነበር፡፡ ነገር ግን ሙሉ በሙሉ ተገጣጥመው የቀረቡ በነዳጅ የሚሠሩ የቤት አውቶሞቢሎችና ባለሦስት እግር ተሽከርካሪዎች ላይ የተጣለው ዕገዳ እንደሚቀጥል ማስታወቁ አይዘነጋም፡፡